༄༅། །ཕྱི་ལོ་ ༢༠༢༤ ཟླ་ ༠༨ ཚེས་ ༡༡ ཉིན་བོད་ཀྱི་ཟློས་གར་ཚོགས་པའི་གར་གླུའི་རིག་རྩལ་ཁང་དུ་ཟློས་གར་ཚོགས་པ་དབུ་བརྙེས་ནས་མི་ལོ་ ༦༥ འཁོར་བའི་དུས་དྲན་སྲུང་བརྩི་གནང་བ་དང་བསྟུན་རྒྱ་ལུ་རུ་ཁག་དང་རྔོན་པ་རུ་ཁག་གཉིས་དབར་རྐང་བྲོ་གླུ་གཞས་ཀྱི་རྟིང་རྩོད་འགྲན་བསྡུར་གནང་སྟེ་རྔོན་པ་རུ་ཁག་ལ་ཐེངས་འདིའི་རྒྱལ་ཁ་ཐོབ་སོང་།
ཁ་སང་ཕྱི་ཚེས་ ༡༡ ཉིན་གྱི་ཕྱི་དྲོ་ཆུ་ཚོད་ ༢ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྐོུ་སྤེན་པ་ཚེ་རིང་མཆོག་དང་དམིགས་བསལ་སྐུ་མགྲོན་རྒྱ་གར་དབུས་གཞུང་ཕྱི་སྲིད་ལས་ཁུངས་ཀྱི་སྐུའི་སྣེ་ཤན་པ་སྐུ་ཞབས་ Yashbir Singh མཆོག་དང་རྟེན་ཞལ་རྣམ་གཉིས། ཀང་ར་རྫོང་གི་སྐོར་སྲུང་སྤྱི་ཁྱབ་གཞོན་པ་སྐུ་ཞབས་ Hitesh Lakhanpal མཆོག་དང་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ Ram Swaroop མཆོག་དང་གཞན་ཡང་རྒྱ་གར་སྐུ་མགྲོན་ཁག་ཅིག་དང་། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་དྲུང་ཆེ་དང་ལས་ཟུར་རྣམ་པ། རྡ་ས་ས་གནས་འགོ་འཛིན་གཙོས་པའི་བཞུགས་སྒར་ཁུལ་གྱི་ཚོགས་སྡེ་ཁག་གི་འགན་འཛིན་རྣམ་པ། ཟློས་ཟུར་ཚོགས་མི་རྣམ་པ། བཀུར་འོས་ཟུར་དཔང་རྣམ་པ་དང་གཞན་ཡང་གདན་ཞུས་སྐུ་མགྲོན་བཅས་ཁྱོན་མི་གྲངས་ཉིས་བརྒྱ་ལྷག་ཙམ་མཉམ་བཞུགས་གནང་སོང་།
མཛད་སྒོའི་ཐོག་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ནས་དུས་དྲན་གྱི་ངོ་སྤྲོད་གསུང་བཤད་གནང་བ་དང་། དེ་རྗེས་སྒྱུ་རྩལ་སློབ་ཁྲིད་འགན་འཛིན་བསྟན་འཛིན་ཕུན་ཚོགས་ལགས་ཀྱིས་རུ་ཁག་གཉིས་དབར་གྱི་རྐང་བྲོ་གླུ་གཞས་འགྲན་བསྡུར་གྱི་ཟུར་དཔང་ངོ་སྤྲོད་གནང་སྟེ་རྒྱ་ལུ་རུ་ཁག་དང་རྔོན་པ་རུ་ཁག་བར་རྐྱང་གཞས་དང་མཉམ་གཞས། འཁྲབ་གཞས་བཅས་རྟིང་རྩོད་ཀྱིས་འགྲན་བསྡུར་གནང་རྗེས་རྔོན་པ་རུ་ཁག་ལ་རྒྱལ་ཁ་ཐོབ་སོང་།
འགྲན་བསྡུར་གྲུབ་མཚམས་སུ་དམིགས་བལ་སྐུ་མགྲོན་རྒྱ་གར་དབུས་གཞུང་ཕྱི་སྲིད་ལས་ཁུངས་ཀྱི་སྐུའི་སྣེ་ཤན་པ་སྐུ་ཞབས་ Yashbir Singh མཆོག་ནས་ཟུར་དཔང་རྣམས་ལ་ཐུགས་རྗེ་ལེགས་འབུལ་གྱི་མཇལ་དར་དང་ལེགས་སྐྱེས་གསོལ་བསྩལ་གནང་པ་དང་། སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་ལོ་ངོ་ཉི་ཤུ་ཧྲིལ་པོ་འཁོར་བའི་ལས་བྱེད་ཅིག་ལ་རང་གཞུང་ཆོས་རིག་ལས་ཁུངས་ནས་གསོལ་བསྩལ་གནང་བའི་ཕྱག་འཁྱེར་དང་བྱ་དགའ་ཐོབ་མཁན་རྣམས་ལ་ལེགས་སྐྱེས་གསོལ་བསྩལ་གནང་སོང་།
མཛད་སྒོའི་ཐོག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཚོགས་པ་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་རྒྱ་གར་དུ་བཙན་བྱོལ་ལ་ཕེབས་རྗེས་བོད་ཀྱི་སྲོལ་རྒྱུན་རིག་གཞུང་སྤྱི་དང་ཡང་སྒོས་ཟློས་གར་སྒྱུ་རྩལ་མི་ཉམས་རྒྱུན་འཛིན་གནང་རྒྱུར་དགོངས་བཞེད་ཀྱིས་ཐོག་མར་གསར་འཛུགས་གནང་པ་དང་། དེ་ནས་མི་རབས་རྒན་པ་རིམ་བྱོན་གྱིས་ཚོགས་པ་འདི་ཉིད་ཡར་རྒྱས་གོང་འཕེལ་གཏོང་བར་ཞབས་འདེགས་གང་ལེགས་ཞུས་ཡོད་པས་༸གོང་ས་༸སྐྱབས་མགོན་ཆེན་པོ་མཆོག་དབུས་པའི་མི་རབས་རྒན་བགྲེས་རྣམས་ཀྱི་བཀའ་དྲིན་རྗེས་སུ་དྲན་དགོས་པའི་སྐོར་གཞེན་སྐུལ་གནང་། དེ་བཞིན་ད་ལྟའི་ཆར་བོད་མིའི་གནས་སྡོད་བྱ་ཡུལ་ས་ཕྱོགས་གང་སར་ཟློས་ཟུར་རྣམས་པས་གནས་ཡུལ་ས་གནས་སོ་སོར་བོད་ཀྱི་ཟློས་གར་སྒྱུ་རྩལ་སློབ་ཁྲིད་ཀྱིས་བྱ་བར་གཞོལ་ཏེ་ཁྱབ་བརྡལ་ཆེན་པོ་བྱུང་བ་ནི་བོད་ཀྱི་ཟློས་གར་ཚོགས་པ་ནས་རྨང་གཞིའི་སློབ་སྦྱོང་གཞི་རྟེན་བྱུང་བ་དང་སྦྱང་བརྩོན་བྱས་ཏེ་གྲུབ་འབྲས་བཟང་པོ་བྱུང་བར་སོང་། བོད་ཀྱི་ཟློས་གར་སྒྱུ་རྩལ་རྒྱུན་འཛིན་གྱིས་མི་རབས་གཞོན་པ་ཚོར་སློབ་ཁྲིད་གནང་བར་བསྔགས་བརྗོད་དང་། ཟློས་ཟུར་རྣམས་ནས་ཀྱང་ཟློས་གར་ཚོགས་པར་གང་ཐུབ་ཀྱིས་རྒྱབ་སྐྱོར་གནང་དགོས་པའི་འབོད་སྐུལ་གནང་སོང་། དེ་བཞིན་འདི་ལོའི་དབྱར་སྐྱིད་འགྲན་བསྡུར་འདི་ཡང་སྔར་དང་མི་འདྲ་བར་སྒྱུ་རྩལ་སློབ་མ་རྣམས་ནས་རྣམ་དཔྱོད་རྩལ་བཏོན་གྱིས་ཡར་རྒྱས་རྣམ་པ་ཞིག་མངོན་ཐུབ་པ་བྱུང་སོང་སྙམ་པའི་ཚོར་སྙང་ཆེན་པོ་བྱུང་སོང་ལ། རུ་ཁག་སོ་སོའི་ནང་མཉམ་ཞུགས་གནང་མཁན་བྲོ་པ་རྒན་གཞོན་དང་དགེ་ལས་གཙོས་མཐུན་འགྱུར་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་། བཀའ་ཤག་གི་ངོས་ནས་ཆབ་སྲིད་ཁོ་ན་མིན་པར་རིག་གཞུང་དང་རྩེད་རིགས། སྒྱུ་རྩལ་སོགས་ཀྱི་བརྒྱུད་ལམ་ནས་བོད་དོན་གོ་རྟོགས་སྤེལ་རྒྱུར་གལ་གནད་ཆེན་པོ་འཛིན་བཞིན་ཡོད་པས། ད་བར་བོད་ཀྱི་ཟློས་གར་ཚོགས་པའི་འགོ་ལས་ཐུན་མོང་ནས་བོད་ཀྱི་རིག་གཞུང་རྒྱུན་འཛིན་ཐད་ཞབས་འདེགས་བསྒྲུབས་པར་ཐུགས་རྗེ་ཆེ་ཞེས་གསུངས་སོང་།
གཞི་རྩིའི་འཁྲབ་སྟོན་པ་ཡོངས་ནས་ཟླ་བ་གཅིག་ལྷག་རིང་གཞས་སྣ་འཚོལ་སྒྲུབ་དང་གཞས་གདངས་གསར་རྩོམ། འཁྲབ་སྟོན་སྦྱོང་བརྡར་གཙོས་ལས་རིམ་ཁག་ཉིན་མཚན་ལྟོས་མེད་འབད་བརྩོན་ཆེན་པོ་གནང་ཡོད་པར་སོང་ད་ལན་རྒྱ་ཆེའི་སྐུ་མགྲོན་དང་གཟིགས་མོ་ཡོངས་ནས་བསྔགས་བརྗོད་ཡི་རངས་ཆེན་པོ་གནང་སོང་བས། དེ་འབྲེལ་གྱི་གཞས་ཚིག་དང་འཁྲབ་སྟོན་ལམ་སྟོན་གནང་མཁན་སྤྱི་སྒེར་ཡོངས་ནས་མཐུན་འགྱུར་གང་ལེགས་གནང་བར་ཐུགས་རྗེ་ཆེ་དང་ཡི་རངས་ཆེན་པོ་གནང་སོང་།
