༄༅། །བོད་ཀྱི་ཟློས་གར་ཚོགས་པས་བོད་ནང་མི་སེར་སྤེལ་ཡུལ་གྱི་བཅའ་སྡོད་སློབ་གྲྭ་ཞེས་པའི་གཏམ་བརྗོད་རྒྱས་པ་ཞིག་གཟིགས་འབུལ་ཞུས་གནང་སོང་།

ཕྱི་ལོ་ ༢༠༢༦ ཟླ་ ༩ ཚེས་ ༢༤ ཉིན་བོད་ཀྱི་ཟློས་གར་ཚོགས་པའི་བོད་ནང་མི་སེར་སྤེལ་ཡུལ་གྱི་བཅའ་སྡོད་སློབ་གྲྭ་ཞེས་པའི་གཏམ་བརྗོད་གཟིགས་ཕུད་མཛད་སྒོའི་ཐོག་སྐུ་མགྲོན་གཙོ་བོ་དཔལ་ལྡན་ཤེས་རིག་བཀའ་བློན་སྐུ་ངོ་དབུ་རྒྱན་བསྟན་འཛིན་མཆོག་གདན་ཞུ་མཛད་ཡོད་པ་དང་། དེ་བཞིན་བོད་མིའི་སྒྲིག་འཛུགས་རང་དབང་ཅན་གྱི་འགན་འཛིན་རྣམ་པ་དང་དྲུང་ཆེ་ཆུང།  སློབ་གྲྭ་ཁག་གི་འགན་འཛིན་དང་གཞུང་ཞབས་སྲི་ཞུ་བ་དང་གསར་འགོད་པ་བཅས་འདུ་འཛོམས་གནང་སོང་།

  མཛད་སྒོའི་ཐོག་མར་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་ནས་ད་ལན་གཏམ་བརྗོད་གཟིགས་ཕུད་ཞུ་དགོས་པའི་དམིགས་ཡུལ་ངོ་སྤྲོད་གསུང་བཤད་ནང་། ད་ལན་གྱི་གཟའ་འཁོར་འདི་ནི་དཔལ་ལྡན་བཀའ་ཤག་གི་བཀོད་ཁྱབ་ཕེབས་དོན་ལྟར་ང་ཚོ་རང་དབང་ལུང་པར་གནས་འཁོད་བཙན་བྱོལ་བོད་མི་ཚོགས་སྒེར་ཡོངས་ནས། ལོ་རེའི་ཕྱི་ཟླ་ ༩ པའི་བདུན་ཕྲག་བཞི་པར་མི་རིགས་ཀྱི་ངོ་བོ་གཅེས་སྲུང་གི་ལས་འགུལ་ཅི་རིགས་སྤེལ་རྒྱུ། ཞེས་པའི་དགོངས་དོན་ལྟར་བོད་ཀྱི་ཟློས་གར་ཚོགས་པས་འཁྲབ་གཞུང་གསར་རྩོམ་བགྱིས་ཏེ་འཁྲབ་སྟོན་ཞུས་པ་ཞིག་ཡིན།

འོན་ཀྱང་རྒྱ་ནག་གཞུང་གིས་ཕྱི་ལོ་ ༡༩༥༠ ནས་བོད་ས་བཙན་བཟུང་བྱེད་སྒོ་བརྩམས་པ་ནས་བཟུང་བོད་ཀྱི་ཆོས་དང་རིག་གཞུང་གཙོས་པའི་དགོན་སྡེ་སྟོང་ཕྲག་ལྔ་ལྷག་རྩ་གཏོར་བཏང་ཞིང་། བོད་མི་ས་ཡ་གཅིག་དང་ཕྱེད་ཀ་ཙམ་སྡུག་སྦྱོར་མནར་གཅོད་འོག་འདས་གྲོངས་སུ་གྱུར་ཡོད། དེ་བཞིན་ལོ་རབས་ཁ་ཤས་གོང་ནས་བོད་ནང་མི་སེར་སྤེལ་ཡུལ་གྱི་བཅའ་སྡོད་སློབ་གྲྭ་ཞེས་པར་ཁ་གཡར་ཏེ་བོད་ཀྱི་འབྲོག་ས་དང་ཞིང་ས། གྲོང་ཁྱེར་བཅས་ཀྱི་ནང་ཡོད་པའི་བོད་ཕྲུག་རྣམས་བཙན་ཤེད་ཀྱིས་མི་སེར་སྤེལ་ཡུལ་གྱི་བཅའ་སྡོད་སློབ་གྲྭའི་ནང་བཅུག་ནས། བོད་མི་རིགས་ཀྱི་སྐད་ཡིག་དང་ཕ་མེས་ནས་བརྒྱུད་པའི་ཡུལ་སྲོལ་གོམས་གཤིས་མཚོན་པའི་བསམ་བློའི་འདུ་ཤེས་འཛིན་སྟངས་ཀྱི་གཞི་རྟེན་རྩ་མེད་གཏོང་རྒྱུའི་སྲིད་ཇུས་འདྲ་མིན་སྤེལ་བཞིན་པ་ནི་ཤིན་ཏུ་ཛ་དྲག་ཆེ་ཞིང་མི་རིགས་ཤིག་གི་འཆི་གསོན་མཚམས་ལ་གནས་སྟངས་ཤིག་ཏུ་གྱུར་ཡོད།

དེ་བཞིན་ཉེ་སྔོན་ཕྱི་ཟླ་ ༧ ཚེས་ ༠༡ ནས་བཟུང་ཀྲུང་ཧྰ་མི་དམངས་སྤྱི་མཐུན་རྒྱལ་ཁབ་མི་རིགས་མཐུན་སྒྲིལ་ཡར་ཐོན་ལ་སྐུལ་དེད་ཅེས་པའི་བཅའ་ཁྲིམས་གཏན་འབེབས་ཀྱིས་བོད་ཀྱི་སྐད་ཡིག་རྩ་མེད་བཟོ་རྒྱུའི་སྲིད་ཇུས་དང་འབྲེལ། ཕྱི་ཟླ་ ༧ ཚེས་ ༡༣ ཉིན་རྒྱ་ནག་གཞུང་གིས་སླར་ཡང་གསེར་རྟ་བླ་རུང་སྒར་གྱི་གྲྭ་ཤག་ ༡༠༦༠ ལྷག་ཙམ་གཏོར་བཤིག་བཏང་བ་སོགས་མི་རིགས་མཐུན་སྒྲིལ་སྐུལ་དེད་ཡར་ཐོན་གྱི་ཁྲིམས་ཡིག་ལ་ཁ་གཡར་ཏེ་བོད་ཀྱི་སྐད་ཡིག་དང་རིག་གཞུང་རྩ་མེད་བཏང་སྟེ་མི་རབས་གཅིག་ཙམ་གྱི་རྗེས་སུ་རྩམ་པའི་དྲི་མ་ཙམ་ཡང་མེད་པ་བཟོ་རྒྱུའི་སྲིད་ཇུས་ངན་པ་སྤེལ་དང་སྤེལ་མུས་ཡིན། ཉེ་ཆར་ཕྱི་ཟླ་ ༧ ཚེས་ ༠༢ ཉིན་རྒྱལ་གཅེས་དཔའ་བོ་བློ་དགའ་རང་བཙན་མཆོག་གི་ཞུམ་མེད་ཀྱི་སྙིང་སྟོབས་དང་བོད་མི་རིགས་ཀྱི་ལས་དབང་བསམས་ཏེ་འཛམ་གླིང་མཉམ་སྦྲེལ་རྒྱལ་ཚོགས་ཀྱི་མདུན་ཐང་དུ་སྐུ་ལུས་མེ་མཆོད་ཕུལ་ནས་བཙན་བྱོལ་དུ་གྱར་བའི་བོད་རིགས་སྤུན་ཟླ་ཡོངས་ནས་མཐུན་སྒྲིལ་རྡོག་རྩ་གཅིག་ཏུ་བསྒྲིལ་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་གནང་དགོས་པ་དང་། གཞིས་ལུས་མིང་མང་གིས་མངོན་འདོད་བསྒྲུབ་དགོས་པའི་ཁ་ཆེམས་བཞག་གནང་ཡོད་པར་སོང་། ང་ཚོ་བཙན་བྱོལ་དུ་གྱར་པའི་ཚོགས་སྡེ་སྤྱི་དང་བོད་མི་ཡོངས་ནས་བོད་ཀྱི་ཆོས་དང་རིག་གཞུང་སྲུང་སྐྱོབ་གནང་རྒྱུའི་ཆེད་ལས་འགུལ་རབ་དང་རིམ་པ་སྤེལ་བཞིན་ཡོད་སྟབས། ད་ལན་གཏམ་བརྗོད་འདི་ཉིད་གཟིགས་འབུལ་ཞུ་བཞིན་ཡོད་བཅས་བཀའ་སློབ་གནང་སྟེ་བོད་ཀྱི་ཟློས་གར་ཚོགས་པའི་ཉམས་ཞིབ་པ་དང་འཁྲབ་གཞུང་རྩོམ་པ་པོ་ལྷ་ཞོལ་བསོད་ནམས་ཚེ་བརྟན་ལགས་ཀྱིས་གསར་རྩོམ་གནང་བའི་བོད་ནང་མི་སེར་སྤེལ་ཡུལ་གྱི་བཅའ་སྡོད་སློབ་གྲྭ་ཞེས་པའི་གཏམ་བརྗོད་དངོས་སུ་གཟིགས་འབུལ་ཞུས་གནང་སོང་།

གཏམ་བརྗོད་གཟིགས་ཕུད་གྲུབ་རྗེས་དེ་རིང་གི་སྐུ་མགྲོན་གཙོ་བོ་དཔལ་ལྡན་ཤེས་རིག་བཀའ་བློན་མཆོག་ནས་བཀའ་སློབ་གསུང་བཤད་ནང་། ད་ལྟའི་ཆར་བཙན་བྱོལ་དུ་གནས་ཡོད་བོད་མིའི་ཚོགས་སྒེར་ཡོངས་ནས་དཔལ་ལྡན་བཀའ་ཤག་གི་བཀོད་ཁྱབ་བཞིན་ཟླ་དགུ་པའི་བདུན་ཕྲག་བཞི་པའི་ནང་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་གཟའ་འཁོར་དང་འབྲེལ་ཏེ་ལས་འགུལ་སྣ་མང་སྤེལ་བཞིན་ཡོད་པ་དང་། དེ་རིང་བོད་ཀྱི་ཟློས་གར་ཚོགས་པའི་ངོས་ནས་དུས་ཚོད་ཐུང་ཐུང་ནང་བོད་ནང་གི་དངོས་ཡོད་གནས་སྟངས་མཚོན་པའི་མི་སེར་སྤེལ་ཡུལ་གྱི་བཅའ་སྡོད་སློབ་གྲྭའི་གནས་སྟངས་དང་འབྲེལ་ཏེ་ཚོར་ཤུགས་ཆེན་པའི་གཏམ་བརྗོད་གཟིགས་འབུལ་ཞེ་དྲགས་ཡག་པོ་ཞུས་གནང་སོང་བས་ཐུགས་རྗེ་ཆེ་ཞུ་རྒྱུ་དང་། གཏམ་བརྗོད་བོད་མི་གནས་ཡུལ་ཚོགས་སྒེར་སྤྱི་དང་ལྷག་པར་དུ་བོད་མིའི་སློབ་གྲྭ་ཁག་ནང་གཟིགས་འབུལ་ཞུ་ཐུབ་ན་ཧ་ཅང་ཡག་པོ་འདུག་ཅེས་བཀའ་སློབ་བསྩལ་གནང་སོང་།

  དེ་རྗེས་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་ནས་ཐུགས་རྗེ་ཆེ་གསུང་བཤད་ནང་། བོད་ཀྱི་ཟློས་གར་ཚོགས་པའི་ངོས་ནས་མི་སེར་སྤེལ་ཡུལ་གྱི་བཅའ་སྡོད་སློབ་གྲྭའི་གཏམ་བརྗོད་འདི་ཉིད་རིང་མིན་བོད་མི་གནས་ཡུལ་གྱི་སློབ་གྲྭ་དང་གཞིས་ཆགས་ཁག དེ་བཞིན་རྒྱ་གར་མི་དམངས་ཚོར་གཟིགས་འབུལ་ཞུ་འཆར་ཡོད་སྐོར་ངོ་སྤྲོད་གནང་སྟེ། ད་ལན་མཛད་སྒོའི་ཐོག་ཕེབས་པའི་སྐུ་མགྲོན་གཙོས་གཟིགས་མོ་བ་ཡོངས་ནསར་ཚོར་ཤུགས་ཆེན་པོས་དགའ་སྐྱོ་འདྲེས་མའི་མཆི་མས་བརླན་ཏེ་བསྔགས་བརྗོད་ཆེན་པོ་གནང་བ་ཐུགས་རྗེ་ཆེ་ཞུས་གནང་སོང་།