ཟློས་གར། ང་༢༠།༢༠༢༤།
བོད་ཀྱི་ཟློས་གར་ཚོགས་པ་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་དགོངས་བཞེད་འོག་བཙན་བྱོལ་དུ་ཕེབས་པ་ཐག་བོད་ཀྱི་མཐུན་མོང་མ་ཡིན་པའི་སྲོལ་རྒྱུན་གྱི་རིག་གཞུང་རྒྱུན་སྐྱོང་དང་གོང་སྤེལ་སླད་ཆེད་འཛུགས་གནང་བ་ལྟར། ད་བར་མགོན་པོ་གང་ཉིད་ཀྱི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བོད་ཀྱི་ཟློས་གར་ཚོགས་པས་བོད་ཀྱི་མཐུན་མོང་མ་ཡིན་པའི་འཁྲབ་སྟོན་གྱི་རིག་གཞུང་སྤྱི་དང་སྒོས་སུ་བོད་ཀྱི་ལྷ་མོའི་སྒྱུ་རྩལ་རིག་གཞུང་རྒྱུན་སྐྱོང་དང་དར་སྤེལ་གྱི་སྒོ་ནས་རང་རེའི་མི་རབས་གཞོན་པ་རྣམས་ལ་རྒྱུད་སྤྲོད་ཞུ་བའི་བྱ་བཞག་མི་དམན་ཙམ་སྒྲུབ་མུས་ལྟར། ད་ལན་འདི་ག་བོད་ཀྱི་ཟློས་གར་དུ་སྒྱུ་རྩལ་སློབ་གཉེར་བ་སློབ་ཕྲུག་བུ་ ༧ དང་བུ་མོ་ ༧ གསར་འཇུག་གི་གོ་སྐབས་འབུལ་རྒྱུ་ལགས་ན། རང་རེའི་གཞོན་སྐྱེས་ཁྲོད་བོད་ཀྱི་ཟློས་གར་རིག་གཞུང་དང་རོལ་དབྱངས་ལ་དོ་དབྱིངས་ཡོད་མཁན་རྣམས་ནས་འདི་ག་ཟློས་གར་སྒྱུ་རྩལ་སློབ་གཉེར་བ་གསར་འཇུག་ཁོངས་ཞུགས་བློ་མཆིས་ཚེ་གཤམ་གསལ་ཆ་རྐྱེན་ཚང་བའི་དོན་གཉེར་ཅན་རྣམས་ནས་ཕྱི་ལོ་ ༢༠༢༤ ཟླ་ ༣ ཚེས་ ༡༥ འགྱངས་མེད་དགོས་མཁོའི་ཡིག་ཆ་ཁག་དང་མཉམ་དུ་ཟློས་གར་སྤྱི་ཁྱབ་འགན་འཛིན་མཚན་ཐོག་སྙན་ཞུ་འབུལ་དགོས།
དགོས་ངེས་ཆ་རྐྱེན།
- བོད་ཀྱི་ཟློས་གར་སྒྱུ་རྩལ་དང་རོལ་དབྱངས་ཐོག་དོ་སྣང་ཡོད་པ།
- ཕྱི་ལོ་ ༢༠༢༤ ཟླ་ ༣ ཚེས་ ༣༡ བར་དང་བླངས་དཔྱ་དེབ་ཀྱི་འབུལ་བབ་གཙང་འབུལ་ཟིན་པའི་ཤོག་ངོས་དང་པོ་དང་མཐའི་མའི་ངོ་བཤུས།
- རྒྱ་གར་དུ་གནས་སྡོད་ཆོག་པའི་སྐྱབས་བཅོལ་ལག་འཁྱེར་(RC)གྱི་ངོ་བཤུས་དང་། བལ་ཡུལ་དུ་གནས་སྡོད་་ས་གནས་འགོ་འཛིན་གྱི་ངོས་སྦྱོར་མཉམ་སྦྱར་དགོས་རྒྱུ། དེ་མིན་རྒྱ་གར་གྱི་ Passport ཡིན་ན་དེའི་ངོ་བཤུས།
- ཕྱི་ལོ་ ༢༠༢༤ ཟླ་ ༣ ཚེས་ ༡ ཉིན་རང་ལོ་ ༢༠ ལས་མ་བརྒལ་བ་དགོས།
- གཟུགས་ཐང་ལས་འཕེར་ཡིན་པའི་སྨན་པ་ཚད་ལྡན་གྱི་ངོས་སྦྱོར་སྟེང་དོ་བདག་གི་འདྲ་པར་ཐོག་སྨན་པའི་མཚན་ རྟགས་ཡོད་པ།
- ཉུང་མཐའི་ཤེས་ཚད་འཛིན་རིམ་བརྒྱད་པ་མཐར་སོན་པ་ཞིག་དགོས།
- གཟུགས་པོའི་རིང་ཚད་ 4.10 ft to 5.7 ft བར་དགོས།
འདེམས་རྒྱུགས་ལས་རིམ།
- དོ་བདག་རང་ཉིད་ནས་གཞས་དང་། རོལ་ཆ། ཞབས་བྲོ་སོགས་འཁྲབ་སྟོན་གྱི་བརྙན་ཐུང་སྐར་མ་ ༢ ལས་མ་བརྒལ་བ་ཞིག་བརྙན་པར་བཅོས་སྒྲིག་གང་ཡང་མེད་པར་གཤམ་གསལ་ཞལ་དཔར་ཨང་གྲངས་བརྒྱུད་སྐད་འཕྲིན་ནང་བསྐུར་དགོས་རྒྱུ།
- དྲྭ་ཐོག་ནས་སྔོན་འགྲོའི་འདེམས་སྒྲུག་བྱུང་རིགས་དངོས་གཞིའི་འདེམས་རྒྱུགས་བོད་ཀྱི་ཟློས་གར་དུ་བྱ་རྒྱུ།
ཐུགས་སྣང་།
- ལོ་ལྔའི་རིང་རྨང་གཞིའི་སྦྱོང་བརྡར་རྐང་བྲོ་གླུ་གཞས་དང་། གཏམ་བརྗོད། རོལ་ཆ། ལྷ་མོ། བོད་ཡིག་དང་དབྱིན་ཡིག་སོགས་ཀྱི་སྦྱོང་བརྡར་སྤྲོད་རྒྱུ་དང་། ལོ་གསུམ་རྗེས་རྒྱུགས་སྤྲོད་ཐོན་རིགས་མཚམས་སྦྱོར་འཛིན་གྲྭར་ལོ་གཉིས་འགྲིམ་དགོས་པ་དང་རྒྱུགས་འཕྲོད་པ་རྣམས་བྲོ་པ་གཞོན་པར་གནས་སྤར་གྱིས་གླ་ཕོགས་ཞུ་ལེན་ཆོག
- སྦྱོང་བརྡར་དུས་ཡུན་རིང་ཟས་གོས་གནས་མལ་དང་སློབ་སྦྱོང་སོགས་རིན་མེད་མཐུན་འགྱུར་ཞུ་རྒྱུ་དང་། ཚོགས་པའི་སྒྲིག་གཞི་གཞིར་བཟུང་སྦྱོང་བརྡར་བསྒྲུབས་རྗེས་ཞབས་ལོའི་དུས་ཡུན་མ་ཚང་གོང་དགོངས་ཞུ་བྱ་དགོས་བྱུང་ཚེ། དུས་ཡུན་དེ་དག་རིང་གི་སློབ་ཡོན་འགྲོ་གྲོན་ཆ་ཚང་གཏན་འབེབས་ལྟར་ཕྱིར་སློག་དགོས་རྒྱུ།
- གོང་གསལ་ལག་འཁྱེར་དང་ཡིག་ཆ་ཁག་གི་ངོ་བཤུས་སྟེང་བོད་མིའི་སྒྲིག་འཛུགས་ཀྱི་ལས་བྱེད་ཟུང་དྲུང་ཡན་ནམ་ས་གནས་འགོ་འཛིན་ཡང་ན་བོད་མིའི་སློབ་གྲྭ་ཁག་གི་འཛིན་རིམ་བཅུ་པ་ཡན་གྱི་སློབ་སྤྱི་བཅས་སུ་རུང་ནས་ངོ་བཤུས་ཡིག་ཆ་ཁག་འཁྲུལ་མེད་ཡིན་པའི་དག་མཆན་མཚན་རྟགས་ངེས་པར་ཞུ་དགོས་པ་བཅས་ཀྱི་གསལ་བསྒྲགས་སུ།
- བོད་ཀྱི་ཟློས་ཚོགས་ཚོགས་པའི་སྤྱི་ཁྱབ་ལས་ཁུངས་ནས། ཕྱི་ལོ་ ༢༠༢༤ ཟླ་ ༢ ཚེས་ ༡ ལ།།
སྤྱི་ཁྱབ་འགན་འཛིན།
གློག་འཕྲིན་ཁ་བྱང་། [email protected]
འབྲེལ་གཏུགས་ཁ་པར་ཨང་།༨༨༩༤༩༩༦༦༤༦ (WhatsApp)
