རྒྱ་གར་འཕགས་ཡུལ་བྱང་ཕྱོགས་ཨུ་ཌར་ཀན་མངའ་སྡེའི་རྒྱལ་ས་སྡེ་ར་སྡུན་དོན་གྲུབ་གླིང་གཞིས་ཆགས་སུ་གཏན་གཞི་ཆགས་པའི་སྔ་འགྱུར་རྙིང་མའི་གདན་ས་ཆེན་པོ་འོག་མིན་ཨྱོན་སྨིན་གྲོལ་གླིང་གི་༸སྐྱབས་རྗེ་སྨིན་གླིང་རྗེ་བཙུན་མཁའ་འགྲོ་རིན་པོ་ཆེ་མཆོག་གིས་ཇི་ལྟར་གསོལ་བ་བཏབ་པ་བཞིན། བཀའ་གཏེར་སྨིན་གྲོལ་རྒྱ་མཚོའི་མཛོད་འཛིན་༸སྐྱབས་རྗེ་ཞེ་ཆེན་རབ་འབྱམས་རིན་པོ་མཆོག་གི་ཞལ་སྔ་ནས། སྨིན་གླིང་གདན་སར་སྔ་འགྱུར་བཀའ་མའི་དབང་ལུང་ལེགས་གྲུབ་ཀྱི་དགའ་སྟོན་དང་འཕགས་ཡུལ་ཨོ་རྒྱན་སྨིན་གྲོལ་གླིང་དབུ་བརྙེས་ནས་མི་ལོ་ཧྲིལ་པོ་ ༦༠ འཁོར་བའི་དུས་དྲན་ཡང་སྲུང་བརྩི་ཞུ་བའི་བཀྲ་ཤིས་རྟེན་འབྲེལ་གྱི་དུས་ཚེས་ཁྱད་པར་ཅན་འདིར་བོད་ཀྱི་ཟློས་གར་ཚོགས་པའི་ངོས་ནས་བོད་ཀྱིས་མཐུན་མོང་མ་ཡིན་སྲོལ་རྒྱུན་གཞས་སྣ་གཟིགས་འབུལ་ཞུས་ཡོད། དེ་ཡང་གཞི་རྩའི་བོད་ཀྱི་ཟློས་གར་སྒྱུ་རྩལ་སློབ་གཉེར་ཁང་གི་དགུན་ཁའི་གུང་སེང་དུས་ཚེས་ཁེལ་ཡོད་ནའང་། སྔ་འགྱུར་བཀའ་མའི་དབང་ལུང་ལེགས་གྲུབ་ཀྱི་དགའ་སྟོན་དང་ཨྱོན་སྨིན་གྲོལ་གླིང་ཕྱག་བཏབ་ནས་མི་ལོ་ཧྲིལ་པོ་ ༦༠ འཁོར་བའི་དུས་དྲན་སྲུང་བརྩི་ཞུ་བའི་སྐལ་བཟང་དུས་སྟོན་འདིར་འབྲེལ་ཡོད་གོ་སྒྲིག་ཚོགས་ཆུང་གིས་གདན་ཞུ་ཕུལ་འབྱོར་བྱུང་བའི་གོ་སྐབས་བཟུང་སྟེ་དགུང་ཁའི་དགུང་སེང་ཕྱི་བསྣུར་གྱིས་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་དོན་གྲུབ་ཚེ་རིང་ལགས་ཀྱི་སྣེ་ཁྲིད་འོག སྒྱུ་རྩལ་སློབ་ཁྲིད་འགན་འཛིན་དང་དགེ་རྒན་དང་སྒྱུ་རྩལ་བ་བསྡོམས་གྲངས་ ༣༥ ངོ་བཅར་གྱིས་འདི་གའི་འགོ་ལས་སྒྱུ་རྩལ་བ་རྣམས་ལ་༸སྐྱབས་རྗེ་སྨིན་གླིང་ཁྲི་འཛིན་པོ་མཆོག་གི་སྐུ་གདུང་ཞལ་མཇལ་དང་། ༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་གི་བཀའ་སྒོ་དང་མཇལ་ཁ། དེ་བཞིན་༸སྐྱབས་རྗེ་སྨིན་གླིང་རྗེ་བཙུན་མཁའ་འགྲོ་རིན་པོ་མཆོག་གིས་མཇལ་ཁ་དང་བཀའ་སློབ། གདན་ས་སྨན་གླིང་དུ་མཆོད་མཇལ་དང་། དེ་བཞིན་ཕྱི་ཚེས་ ༦ ཉིན་དགོང་དྲོ་ཕྱག་ཚོད་ ༧ ཐོག་རྟེན་འབྲེལ་གྱི་རོལ་མོའི་མཆོད་དབྱངས་ཀྱི་དགའ་སྟོན་ཉིན་སྐུ་མགྲོན་གི་གཙོ་བོ་༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་དང་། ༸སྐྱབས་རྗེ་འཁོར་ཆེན་རིན་པོ་ཆེ་མཆོག ༸སྐྱབས་རྗེ་སྨིན་གྲིང་རྗེ་བཙུན་མཁའ་འགྲོ་རིན་པོ་ཆེ་མཆོག་གཙོས་པའི་སྐྱེ་ཆེན་གྱི་བླ་སྤྲུལ་རྣམ་པ་དང་། གྲྭ་བཙུན་སྔགས་གསུམ་གྱི་སྡེ། ཕྱི་ནང་ནས་ཆེད་བཅར་དད་ལྡན་ཆོས་ཞུ་བ་སྟོང་ཚོ་གསུམ་ལྷག་འདུ་འཛོམས་ཐོག་ཨྱོན་སྨིན་གྲོལ་གླིང་གོ་སྒྲིག་ཚོགས་ཆུང་གི་ཟུང་དྲུང་བླ་མ་བསྟན་སྐྱབས་མཆོག་ནས་འཚམས་འདྲི་གསུང་བཤད་རྗེས་བོད་ཀྱི་ཟློས་གར་ཚོགས་པའི་སྤྱི་ཁྱབ་འགན་འཛིན་ནས་འཚམས་ཞུ་དང་ངོ་སྤྲོད་སྙིང་བསྡུས་ཞུས་རྗེས་བོད་ཀྱི་ཟློས་གར་ཚོགས་པའི་སྒྱུ་རྩལ་བ་རྣམས་ནས་རྟེན་འབྲེལ་དགའ་སྟོན་གྱི་མཆོད་པའི་རོལ་དབྱངས་ཚུལ་དུ་བོད་ཀྱི་གནའ་བོའི་རིག་གཞུང་གཞས་སྣ་གཟིགས་འབུལ་ཞུས་སྐབས་བསྟན་བདག་བླ་ཆེན་གཙོས་པའི་དད་ལྡན་ཆོས་ཞུ་བ་རིས་མེད་སེར་སྐྱ་ཕོ་མོ་རྣམས་ནས་དགའ་ཚོར་ཆེན་པོའི་ཐལ་སྒྲའི་ཁྲོད་ཡིད་རང་བསྔགས་བརྗོད་གནང་བ་ནི་བོད་ཀྱི་ཟློས་གར་ཚོགས་པའི་རིག་གཞུང་གཅེས་འཛིན་ཞུ་མཁན་སྒྱུ་རྩལ་བ་ཡོངས་ལ་ཆེ་མཐོང་དང་ཕྱི་ལོ་གསར་པའི་ཟླ་བ་དང་པོ་ཤར་བའི་སྐབས་བསྟན་བདག་བླ་ཆེན་དབུ་བཞུགས་ཐོག་དད་ལྡན་ཆོས་ཞུ་བ་སྟོང་ཚོ་མང་པོའི་མདུན་བོད་ཀྱི་མཐུན་མོང་མ་ཡིན་པའི་རིག་གཞུང་གཞས་སྣ་གཟིགས་འབུལ་ཞུ་ཐུབ་པ་ནི་སྒྲིབ་སྦྱང་ཚོགས་བསགས་ཀྱི་མཐུས་ཕྱི་ནང་གི་འགལ་རྐྱེན་ཐམས་ཅད་ཞི་བའི་རྟགས་དང་རྟེན་འབྲེལ་བཟང་པོའི་མཚན་མར་མངོན། ༸སྐྱབས་རྗེ་སྨིན་གླིང་རྗེ་བཙུན་མཁའ་འགྲོ་རིན་པོ་མཆོག་དབུས་པའི་སྔ་འགྱུར་རྙིང་མའི་གདན་ས་ཨྱོན་སྨིན་གྲོལ་གླིང་གི་གོ་སྒྲིག་ཚོགས་ཚུང་གི་ཟུང་དྲུང་བླ་མ་བསྟན་སྐྱབས་མཆོག་དང་ཚོགས་ཆུང་གི་རྒྱུན་ལས་རྣམས་ནས་བོད་ཀྱི་ཟློས་གར་ཚོགས་པའི་འགོ་ལས་འཁྲབ་སྟོན་པ་ཡོངས་ཀྱི་བཞུགས་གནས་དང་ཞལ་ལག་མཐུན་འགྱུར་མཐུན་འགྱུར་གང་ལེགས་གནང་བར་ལ་འདི་གའི་དགེ་ལས་ཚོགས་མི་ཡོངས་ཀྱི་ཚབ་ཞུས་ཏེ་བཀའ་དྲིན་ཆེ་ཞུ་བ་དང་སྦྲགས་མ་འོངས་པ་ཡང་དེ་འདྲའི་གོ་སྐབས་སྐྱབས་འཇུག་ཡོང་བའི་རེ་འདུན་ཞུ་རྒྱུ་ཡིན།
